3大自駕遊好去處
放假又冇得去旅行，留係香港除咗行街睇戲食飯到底仲有咩做？
其實係香港都有好多靚景俾你過下鋪旅行癮㗎！今日就同大家介紹下3個有靚景嘅遊車河熱點，無論你係山系男女、鍾情海濱、又或熱愛打卡，你都一定可以揾到可以同屋企人、朋友或者情侶一齊去嘅好地方！
就算冇車，其實而家租車都好方便㗎～
1. 下白泥
講起下白泥，你可能就係會諗起 IG 上面一堆嘅日落美景
但其實除咗日落，下白泥仲有生機蓬勃嘅紅樹林溼地同景點㗎
地點：新界西北元朗流浮山
泊車位置：路邊避車處、鴨仔杭士多
必去景點一：天空之鏡
多數人都係因為下白泥嘅日落美景慕名而來，但其實早多少少時間，係潮漲嘅下白泥又可以睇到另一番絕色
係水面嘅倒影下可以影到天上嘅藍天白雲，妨如天空之鏡
但好易受天氣影響，記得要留意天氣預報啊！
Cr.: 佳能香港
必去景點二：鴨仔杭士多
鴨仔杭士多係木屋造型，好有特色，仲可以影靚相打卡
作為自駕遊嘅好去處佢除咗俾個地方大家休息，食下好嘢之外，仲有得泊車！而且日泊都只係$50樓下
呢到仲有指示牌帶大家去睇日落最靚嘅地方添
但其實呢到只係中白泥，要落到下白泥仲要行大概20分鐘㗎
Cr.: 鴨仔杭士多Facebook
必去景點三：泥灘及紅樹林
中意觀察生物嘅朋友仔嚟到下白泥一定唔好放過呢個機會，要盡情做個「低頭族」
因為你會係呢到見到紅樹林、招潮蟹、彈塗魚等等嘅生物
除咗呢啲常見嘅溼地生物之外仲有存在咗4億幾年嘅「活化石」馬蹄蟹（學名：鱟），佢雖然叫蟹但其實係蠍子同蜘蛛嘅近親！而且佢身上流嘅藍色血液係有非常之珍貴嘅醫用價值㗎
Cr.: 香港商報
必去景點四：日落及七色彩霞
下白泥最出名嘅莫過于日落美景，蔚藍嘅天空慢慢變橙，再染上或紫或紅嘅晚霞，真係美不勝收
但李商隱都話過：「夕陽無限好，只是近黃昏」，呢幅美好光景都係轉瞬而逝，大家要把握時間欣賞
Cr.: ELLE HK
太陽落山之後，好彩嘅話仲會遇上彩霞
本身已經咁靚畫面會染上再加綺麗嘅淋漓七色，所以唔好咁心急返屋企，俾多少少時間睇下會唔會咁好彩遇上呢番奇景啦！
Cr.: COSMOPOLITAN
2. 大帽山
大帽山係香港海拔最高嘅山，但因為全程都係石屎車路，所以自駕遊其實比第二高嘅鳳凰山同第三嘅大東山其實更加好行！
係荃灣上到大帽山郊野公園，右轉落去就係一個大停車場
沿途都有好多靚景同植被，上到去仲可以俯瞰維多利亞港、九龍至港島嘅景色，真係一望無際
一年四季都有唔同嘅植物盛開，幾時去都係打卡一流！
地點：香港大帽山大帽山道
泊車位置：大帽山郊野公園停車場、沿途泊車位/空地
Cr.: Google Map
必去景點一：扶輪公園
扶輪公園外嘅小食店前種咗數十棵山櫻花樹，每年2月底到3月初就會綻放
公園24小時開放，可以係夜幕降臨後，嚟拍攝美麗嘅夜櫻
甚至係天氣好嘅情況下仲有機會影到銀河星海
Cr.: Hopetrip旅遊網
必去景點二：大帽山觀景台
除咗啱啱講嘅可以俯瞰市區，感受下「大地在我腳下」之外，呢到仲有好靚嘅大自然美景
秋天嗰時，有「香港薰衣草」美譽嘅紫花香薷會係到盛放
大帽山觀景台附近仲有一塊大約兩米高嘅巨石，秋冬時分會有大量芒草生長
黃昏餘暉映照嗰時，隨風搖曳嘅芒草恍惚閃爍著金光，每年都吸引唔少人嚟朝頭聖
Cr.: 香港旅遊發展局
必去景點三：天氣雷達站
香港天文台1999年係大帽山道嘅最高點裝置咗天氣雷達，海拔約950米，視野好開揚
雷達站下面嘅髮夾彎路兩邊都有唔少芒草，都係一個打卡好地方
Cr.: travelwithangel
3. 大尾篤
大尾篤最啱就係一家大細去玩，有得踩單車、BBQ、釣魚、放風箏、仲有水上活動玩，一日真係眨下眼就過咗
由大埔墟入去，沿新娘潭經鹿頸入嘅話可以飽覽吐露港海景
沿途仲有多個廁所同士多可以休息
大尾篤又多車位，一入停車場既右面三行原來有一部分車位無咪錶 (免費泊車)㗎，但其他錶位都係唔使$20一個鐘啫，真係啱曬自駕遊啊
地點：大尾篤船灣淡水湖
泊車位置：大尾篤停車場
必去景點一：水壩
船灣淡水湖係全港最長的水壩，係觀景台到可以俯瞰垂直嘅水壩、仲可以眺望到對面嘅馬鞍山！
Cr.: 香港旅遊發展局
必去景點二：水上活動中心
係到可以租用獨木舟、帆船同風帆衝浪板，每個錢港幣$14起，好抵玩㗎！
而家仲新增咗水上單車，大人細路都有嘢啱玩嘅
Cr.: 大叔旅遊日記
必去景點三：BBQ
大尾篤最出名就緊係燒野食啦，呢到嘅爐夠多夠新淨
自己揸車帶嘢食嚟燒，想要補給嘢食嘢飲附近都有幾間士多㗎
Cr.: 假期日常
必去景點四：龍尾泳灘
龍尾泳灘係繼屯門黃金泳灘之後嘅第二個人工沙灘，全長約200米
呢到都設有70個私家車泊車位，自駕遊直接揸到呢到都得
泳灘嘅更衣室、洗手間、瞭望塔同露天茶座等設施都係採用具時尚感嘅設計感，仲有獨角獸、紅鶴等特色水泡可以租，啱曬影相打卡！
Cr.: 建築署